Үбүлүөйдээх дьоро күн

Муус устар 26 күнүгэр буойун-поэт, суруналыыс, тылбаасчыт Макар Иванович Кузьмин-Макар Хара төрөөбүтэ 110 сылыгар анаан “Күннэр-дьыллар саппаттар…” диэн ааттаах тэрээһин ыытылынна. Бу күн оскуолабыт алын сүһүөх кылаастарын бөлөҕө ыыппыт “Биир дойдулаахпыт М. И. Кузьмин-Макар Хара аата үйэлэргэ умнуллубат” бырайыагынан суруйааччы олорбут, улааппыт дьиэтин эркинигэр мэҥэ бэлиэни ииллибит. Мэҥэ бэлиэни суруйааччы чугас аймаҕа Светлана Климентьевна Архипова, оскуола директора Алексей Валентинович Аржаков уонна алын сүһүөх оскуола бастыҥ үөрэнээччитэ Нарыйа Юнчанова арыйдылар.

             

Ол кэннэ ыалдьыттар, тэрээһин кыттыылаахтара Игнатий Слепцов аатынан норуот айымньытын киинигэр киирдилэр. Манна оскуолабыт иһинэн үлэлиир “Ай-Талаан” театральнай куруһуок (салайааччылар З. П. Боппосова, С. М. Баишева, С. П. Рахлеева) оҕолорун толоруутугар “Саллаат суруктара” поэманан дьүһүйүү көрдүбүт.

Дьүһүйүүнү биһиги телеграм-каналбытыгар бу сигэнэн көрүҥ:

https://t.me/+5t7d_28oSD8zNWYy

Салгыы Макар Хара чугас аймахтара Дьохсоҕонтон Светлана Климентьевна уонна Михаил Лукич Архиповтар, суруйааччы тапталлаах кэргэнин Анна Ивановна Егорова чугас дьоно Ытык-Күөлтэн Клавдия Ивановна, Серафим Семенович Протопоповтар эҕэрдэ тылларын эттилэр. Серафим Семенович убайа Георгий Семенович Протопопов архыып матырыйаалларыттан булбут  чахчыларынан Кузьминнар төрүччүлэрин сырдатыыны оҥордо, онон, тэрээһин кыттыылаахтара билбэтэх чахчыларбытын биллибит.

Суруйааччы үбүлүөйдээх сылынан “Макар Хара-Улуу Кыайыы ырыаһыта” диэн ааттаах республикатааҕы кэтэхтэн аһаҕас хоһоон ааҕыытын конкурсун түмүгүнэн кыайыылаахтары оскуола директорын иитэр үлэҕэ солбуйааччыта А. П. Боппосова наҕараадалаата.

Бу кэнниттэн Макар Хара уонна ырыаһыт Анна Егорова төрөппүт кыыстара Земфира Макаровна Кузьмина нэһилиэкпит олохтоохторун, үөрэнээччилэри эҕэрдэлээбит видеотун көрдүбүт.

Тэрээһин түмүктүүр чааһыгар бүтүн нэһилиэгинэн кыттыбыт 180-тан тахса киһи аахпыт “Саллаат суруктара” поэманан флеш-моб көрдүбүт.

Флеш-мобу биһиги телеграм-каналбытыгар бу сигэнэн көрүҥ:

https://t.me/+5t7d_28oSD8zNWYy