Бу дьыл тохсунньу 20 күнүттэн нэһилиэкпитигэр “Уолба улуу сырыылар суолларын” ааҕар бырайыак үлэтин саҕалаабыта. Бырайыак бастакы томун ааҕыы тохсунньу 20 күнүттэн олунньу 5 күнүгэр диэри ыытыллар. Бастакы том туһунан сырдатар уонна ааҕааччылары көҕүлүүр сыаллаах библиотечнай уруоктар оскуола үөрэнээччилэригэр ыытылла тураллар. Онтон бэҕэһээ, олунньу 2 күнүгэр үөрэнээччилэргэ уонна учууталларга анаан “Улуу сырыылар суолларынан” квест-оонньуу ыытылынна. Тэрээһиҥҥэ барыта 60 үөрэнээччи уонна 9 учуутал кытынна. Квест кыттыылаахтара 6 түһүмэҕинэн сылдьан тэрийээччилэр бэлэмнээбит араас ыйытыыларын, сорудахтарын толорон илин-кэлин түһүстүлэр. Кыттааччылар түһүмэх аайы фишка ыллылар. Бу фишкаларын кинилэр бырайыак үлэлиир кэмин устата мунньуохтара, түмүккэ ким саамай элбэх фишкалаах кыайыылаах аатын ылыаҕа. Бастакы түһүмэх түмүгүнэн саамай элбэх фишкалааҕынан 9 кылаас үөрэнээччитэ Карина Басова, иккис миэстэҕэ 8 кылаас үөрэнээччитэ Алина Таппырова уонна 11 кылаас үөрэнээччитэ Айсена Товарова, үһүс миэстэҕэ 8 кылаастан Сайыына Сидорова тахсан үөрүүлэрэ үксээтэ.