Олунньу 10 күнүгэр Макар Хара аатынан олохтоох библиотекаҕа орто оскуола “Умсулҕан” методическай холбоһугун көҕүлээһининэн Төрүт тыл уонна сурук-бичик күнүн, Аан дойдутааҕы кинигэ бэлэхтиир күнү көрсө “Мин сөбүлээн аахпыт кинигэм” литературнай салон буолан ааста. Нэһилиэкпит кинигэни таптаан ааҕар дьоно бу күн мустан сөбүлээн аахпыт, ааҕа сылдьар кинигэлэрин ис хоһоонун кэпсээн бэйэ-бэйэлэригэр бэлэхтэстилэр, сэҥээрбит кинигэлэрин уларсыкка ыллылар, атастастылар. Тэрээһини оскуолабыт директорын иитэр үлэҕэ солбуйааччыта Анна Петровна Боппосова иилээн-саҕалаан ыытта. Саҕаланыытыгар бэйэтэ саамай сөбүлээн аахпыт Татьяна Находкина кэпсээннэриттэн быһа тардыылары ааҕан мустубут дьону умсугутта.
Ааҕааччыбыт Варвара Константиновна Карбаканова Сардаана ааптардаах “Көтүөккэ хомолто” диэн айымньыны ааҕа сылдьарын кэпсээтэ. Варвара Константиновна үксүн сахалыы тылынан тахсар айымньылары таптаан ааҕар, булт туһунан суруйуулары көтүппэккэ уларсар. Кини кыыһа Изабелла Ивановна эмиэ библиотека бастайааннай ааҕааччыта, үксүн нууччалыы тылынан бэчээттэнэр детективтары ааҕарын ордорор, бу тэрээһиҥҥэ Татьяна Поскачина “Табыллыбыт/ат таптал” кинигэтин кэпсээтэ. Оскуола педагог-библиотекара Зоя Петровна Боппосова таптаан ааҕар поэтын Н.Михалева-Сайа саҥа кинигэтиттэн хоһоон ааҕан иһитиннэрдэ уонна “Учуутал үрдүк аата” сериянан тахсыбыт “Н.Н.Мандарова” кинигэ туһунан сырдатта. Мария Николаевна Басова кэнники сэҥээрэн аахпыт Елена Слепцова – Куорсуннаах «Биһиги тыыннаахпыт» кинигэтин туһунан сэһэргээтэ.
Оскуолабыт алын сүһүөх кылааһын үөрэнээччилэрэ Алина Аржакова Понилар тустарынан “Мой маленький Пони” хас да кинигэтин, Маайа Боппосова эбэтинээн аахпыт “Суобас” кинигэлэрин сырдаттылар. Хомустаан Афанасьев оскуоланан ааҕа сылдьар “Пути великих свершений” (“Улуу сырыылар суолларынан”) 1 томун аахпытын, олус сэргээбитин туһунан санаатын үллэһиннэ.
История учуутала Саргылаана Романовна Мосоркина “Жизнь Пи” кинигэни сырдатта. Математика учуутала Айыына Альбертовна Аржакова биллиилээх дьоннор тустарынан ааҕарын, кэнники Виталий Егоров айымньыларыттан аахпыттарын сырдатта. Оскуолабыт үөрэх чааһыгар директоры солбуйааччы, математика учуутала Сардаана Михайловна Баишева үксүн детективтары ааҕарын туһунан, онтон бу кэнники аахпытыттан “Собачий потрох” диэн биллэр блогер Елена Евдокименко суруйбут кинигэтиттэн быһа тардыылары кыбытан олус кэрэхсэбиллээхтик сэһэргээтэ. Алын сүһүөх оскуола учуутала Саргылаана Петровна Рахлеева “Я выбираю жизнь” диэн Наталья Иванова кинигэтин туһунан санаатын үллэһиннэ. Саха тылын учуутала Саинна Иннокентьевна Рахлеева Стефани Ленд ааптардаах “Уборщица. Рассказ матери одиночки” кинигэни кэпсээтэ. Нуучча тылын учуутала Анна Брониславовна Егорова киһи ис эйгэтин туһунан суруллар кинигэлэри сэҥээрэн ааҕарын туһунан үллэһиннэ уонна кэнники аахпыт Александр Андреев ааптардаах “Открой свой денежный поток” кинигэтин кэпсээтэ.
Тэрээһин олус истиҥник, киһи өссө да салгыы кэпсэтэ, кэпсии олоруон курдук быһыыга-майгыга биир тыынынан ааста. Кыттааччылар да, тэрийээччилэр да олус астынан тарҕастылар.