Алтынньы 14 күнүгэр биһиги нэһилиэкпитигэр бэрт сэргэх, үтүө күн буолан ааста. Ол курдук, саха бастакы үөрэхтээх дьахталларыттан биирдэстэрэ Мария Николаевна Андросова-Ионова төрөөбүт үбүлөүйдээх күнэ. Сарсыардатын олохтоох дьаһалта баһылыга, И. Слепцов аатынан норуот айымньытын киинин коллектива, В. И. Ленин аатынан орто оскуола директорын иитэр үлэҕэ солбуйааччыта, Макар Хара аатынан модельнай библиотека үлэһиттэрэ Ионовтар олорон ааспыт өтөхтөрүгэр сүгүрүйүү оҥордулар.
Күнүскү өттүгэр дьүүллүүр сүбэ хас да секциянан арахсан үлэлээтэ. Ол курдук, “Олоҥхоһут кыыс” күөн күрэс уонна кыраайы үөрэтэр ааҕыылар түмүктэрэ бу күн билиннэ. Киэһэтин алаадьы дыргыл сытынан туолбут норуот айымньытын киинигэр Мария Николаевна олоҕун, үлэтин сырдатар дьүһүйүүнү оскуолабыт “Ай-Талаан” театральнай куруһуогун оҕолоро көрдөрдүлэр. Мантан салгыы нэһилиэкпит араас саастаах кыргыттара олоҥхолоотулар. Долгутуулаах уонна үөрүүлээх түгэнинэн кыайыылаахтары наҕараадалааһын буолла. “Дьэҥкир Алып” түмсүү тэрийбит “Өй оонньуута” нэһилиэк көлүөнэлэригэр анаан ыытылынна. Салгыы хаартысканан кэпсиибит:
