«Уот Дьулустаан» — саҥа сериал

«… Ньукуу лэппиэскэтиттэн ойо ыстаан ылан, ытыгар бырахпыта. Мохсоҕол үөрэн, сахсараҥныы түспүтэ. «Чэ, уонна көрдөөбөккүн!» — кумуччу туттан сытынан кэбиспитэ.

— Мохсоҕол! Уот Дьулустаан туһунан билбэккин дуо?

Ыт аатын истэн ыйылаабыта.

-Билбэт эбит. Уот Дьулустаан туһунан билбэккэ эрэ хайдах киһи буолуом диигин ээ?»

В. Гаврильева «Уот Дьулустаан» сэһэнтэн быһа тардыы.

Валентина Гаврильева «Дьөлүһүөн уга» хомуурунньагар киирбит «Уот Дьулустаан» сэһэни олохтоох библиотекаттан уларсан аах, сэргээ.

В. Гаврильева сэһэнигэр олоҕурбут «Саха» көрдөрөр-иһитиннэрэр хампаанньа саҥа сериала үүнэр нэдиэлэҕэ сүрэхтэнээри турар. Бу саҥа сериалга Уолбаттан төрүттээх Карбакановтар дьиэ кэргэн уһулуннулар. Аҕалара Михаил Филиппович киинэҕэ уһуллубуттарын маннык сырдатта: «Киинэ устар бөлөх сорох тиийбэт таҥастарын, мал-сал уларса Былатыан Ойуунускай аатынан Тааттатааҕы народнай театрга сылдьыбыттар. Мин, любитель артыыс буолан, бу театрга уруккуттан оонньуубун. Бары билэргит буолуо, иккис этээскэ театр артыыстарын галереятыгар хаартыскам ыйанан турар. Ол хаартыскабын киинэни устар бөлөх салайааччыта сөбүлүү көрөн, миэхэ сибээскэ тахсыбыта. Бу иннинэ кастинг ыыппыттарын куоттаран кэбиспит этим. Өссө хамначчыт оруолугар орто саастаах уол оҕо наада диэбиттэригэр, эһээхэйбин Айаалы илдьибитим. Уолум Ытык Күөллээҕи Алампа аатынан 1-гы оскуола 8 кылааһыгар ситиһиилээхтик үөрэнэр. Бастаан истэн баран соччо биһирээбэтэҕэ, онтон  саҥата суох оруол буолар диэн, уолбун тылбар киллэрэн, уһулла барбыппыт. Ол курдук, «Уот Дьулустаан» сериалга мин бэйэм баай киһи оруолугар, онтон уолбут хамначчыт оруолларын толордубут. Бастакы устууну атырдьах ыйыгар Чөркөөххө турар түмэл сиригэр  ыыппыттара. Уолбунаан Айааллыын иккиэн тиийбиппит. Миигин туох да дубля, хос хатылааһына суох, чааска тиийбэт кэмҥэ устан бүтэрбиттэрэ. Уруккуттан театрга оонньуурум онно олук буолбута. Бастакы күҥҥэ 2-3 көстүүнү устубуппут. Онтон уолбун күнү быһа устубуттара. Хамначчыт оруола саҥата суох, дьоҥҥо мал-сал аҕалыы-илдьии этэ. онон, биир күнүнэн уолум уһуллан бүппүтэ. Ити кэннэ, иккис уһуллуум Уус-Алдан улууһугар турар Суотту түмэлин территориятыгар буолбута. Онно эмиэ биир күнүнэн бүппүппүт.  Бу киинэҕэ уһуллубуппутуттан уолбунаан астынныбыт уонна киинэбит тахсарын долгуйа күүтэбит» диэн кэпсээнин түмүктээтэ.

Михаил Карбаканов ыыппыт хаартыскаларын сэргээн көрүҥ:

         

 

Добавить комментарий

Ваш адрес email не будет опубликован. Обязательные поля помечены *