Бу дьыл тохсунньу 20 күнүттэн нэһилиэкпитигэр “Уолба «Улуу сырыылар суолларын” ааҕар» бырайыак үлэтин саҕалыыр. Биһиги киэн туттар биир дойдулаахпыт – Таатта улууһугар баһылыгынан, СР бырабыыталыстыбатын бэрэссэдээтэлинэн, СР тас сыһыаннаһыыга миниистиринэн, Саха сирин Уһук Илиҥҥи федеральнай уокурукка бастайааннай бэрэстэбиитэлинэн, билигин Ил Дархан сүбэһитинэн үлэлии олорор — Георгий Дмитриевич Никонов тус бэйэтин идиэйэтинэн, быһаччы салалтатынан 2012 сыллаахха саҕаламмыт “Пути великих свершений” бырайыагын ааҕан саҕалыахпыт. Бу бырайыак 6 кинигэтин үөрэнээччилэр, учууталлар уонна нэһилиэкпит олохтоохторо ааҕан, Сахабыт сирин историятын, норуоппут улуу сырыылар аартыктарыгар сүҥкэн кылаатын туһунан киэҥ ис хоһоонноох информацияны билиэхпит.
Уолба “Улуу сырыылар суолларын ааҕар” бырайыак 6 түһүмэхтэн туруоҕа, хас түһүмэх аайы библиотечнай уруоктары ыытахпыт, маны таһынан:
1-кы түһүмэххэ үөрэнээччилэргэ, учууталларга, нэһилиэкпит олохтоохторугар анаан квест-оонньууну тэрийэргэ былаанныыбыт.
2-с түһүмэххэ оскуола үөрэнээччилэрин сүһүөхтэринэн арааран драматическай көрүүлэри тэрийиэхпит.
3-с түһүмэххэ кылаастарынан кылгас киинэлэри устан көрөөччү дьүүлүгэр таһаарыахпыт.
4-с түһүмэххэ “Биир кинигэ музейа” тэриллэн бу 4 том туһунан үөрэнээччилэр музейтан элбэҕи билиэхтэрэ.
5-с түһүмэххэ уруһуй конкурсун, маны таһынан Ааллаах Үүн айанньыттарын таҥаһын тигиигэ маастар кылаас ыытыллара былааннанар.
6-с түмүктүүр түһүмэххэ үөрэнээччилэр, олохтоохтор конференцияларынан бырайыакпыт түмүктэниэхтээх.
Олохтоох библиотекаҕа “Пути великих свершений” кинигэ толору хомуурунньуга баар, ол эрээри кинигэни илиигэ уларсыбаппыт. Кинигэ электроннай көрүҥүн ханнык баҕарар электроннай носительга уган биэриэхпит.
Күндү үөрэнээччилэр, учууталлар, нэһилиэкпит олохтоохторо, барыгытын бырайыакка көхтөөхтүк кыттыҥ диэн ыҥырабыт.

Бырайыагы үлэлэтэр бөлөх сырдатыытын уонна ааптар алгыс тылын бу сигэнэн киирэн көрүҥ: