Таатта улууһугар Уолба нэһилиэгэ биир кырдьаҕас нэһилиэгинэн биллэр. Уруккута Байаҕантай улууһугар киирсэрэ, сэбиэттэр былаастара кэлиэн аҕай иннинээҕи сылларга, улуус киинэ буола сылдьыбыт, киэҥ историялаах нэһилиэк буолар. Былатыан Ойуунускай салайааччылаах Саха АССР ревкома 1922 сыллаахха муус устар 22 күнүгэр өрө турааччылары амнистиялыыр туһунан манифеһын таһаарбыта. Манифестка сигэнэн, 1923 сыл муус устар ыйыгар Байаҕантай улууһун Уолбатыгар үрүҥ хамсааһынын салайсыбыт П. И. Оросин, А. И. Говоров, М. П. Слепцов-Отоороп Саха АССР тэриллибитинэн, сэбиэскэй былааһы ылыналларын биллэрбиттэрэ. Быһатын эттэххэ, икки утарыта турбут хамсааһын бэрэстэбиитэллэрэ Уолба сиригэр кэлэн тупсубуттара, бэйэ-бэйэлэригэр доҕордуу илиилэрин ууммуттара.
Бүгүн, сэтинньи 1 күнүгэр, нэһилиэкпитигэр бу Манифест (Тупсуу) туолбутун туоһулуур Мэҥэ бэлиэни туруоруу тэрээһинэ буолан ааста. Мэҥэ бэлиэ арыллыытын үөрүүлээх чааһыгар Таатта улууһун аҕа баһылыга А. С. Бурцев, Ил Дархан сүбэһитэ, биир дойдулаахпыт Г.Д.Никонов, “Тааттаавтодор” тэрилтэ директора И. И. Бочонин, улуустааҕы НАДь директора Г. Г. Вырдылин кыттыыны ыллылар. Улууспут аҕа баһылыга сэтинньи ый Таатта улууһугар Былатыан Ойуунускай сырдык аатын үйэтитии ыйынан биллэриллэрин иһитиннэрдэ. Бочонин И. И. Мэҥэ бэлиэ туруоруллубут сүрүн сыалын-соругун билиһиннэрдэ. Г. Г. Вырдылин Тупсуу Таатта Уолбатыгар буолбутун, ону үйэтитэр тоҕоостооҕун аан бастакынан тылы көтөхпүт киһинэн биир дойдулаахпыт, Саха сирин суруйааччыларын сойууһун салайааччыта Г. Г. Андросов буоларын бэлиэтээтэ. Үөрүүлээх тэрээһиҥҥэ Уолба орто оскуолатын Ил Ситим оҕо тэрилтэтин председателэ Дьулус Боппосов эҕэрдэтин эттэ.
Тэрээһин Мэҥэ бэлиэҕэ сибэкки дьөрбөтүн ууруунан түмүктэннэ.