2023 сыллаахха саха норуотун чулуу уола Былатыан Ойуунускай төрөөбүтэ 130 сылын чэрчитинэн улууспут нэһилиэктэрин икки ардыларыгар уус-уран самодеятельноһы көрүү фестиваль балаһыанньата тахсыбыта. Сыл бүтүүтэ, кэккэ биричиинэлэринэн, фестивальбыт буолар күнэ-дьыла көһөн, 2024 сыл олунньу ыйыгар улууспут бары нэһилиэктэрин хабан ыытылла турар. Бүгүн, олунньу 16 күнүгэр биһиги Уолбабытыгар күнүс 2 чаастан Былатыан Ойуунускай төрөөбүтэ 130 сылыгар аналлаах «Түмсүү — төлкө төрдө» фестиваль үрдүк таһымҥа буолан ааста. Фестивальга сыанабыл биэрэ улууспут кииниттэн 6 киһилээх жюри кэлэн үлэлээтэ. Игнатий Слепцов аатынан норуот айымньытын киинин киэҥ саалатыгар талааннаах дьоммут уонна оскуолабыт үөрэнээччилэрин уустаан-ураннаан оҥорбут бииртэн-биир кэрэ көстүүлээх оҥоһуктара, уруһуйдара кэчигирээн турдулар, кэлбит дьон хараҕын сымнаттылар. Улууспут кииниттэн кэлбит жюри, бастатан туран, эрдэ уһуллан бэлэмнэниллибит П. А. Ойуунускай олоҕугар, айар үлэтигэр анаммыт дьүһүйүүнү көрдө.

Академическай концерт Таатта улууһун гимниттэн саҕаланна.

Бу кэннэ баһылык А. А. Винокуров нэһилиэкпит 20 сыллаах сайдыытын тосхоллорун кэпсээтэ. Орто оскуолабыт биир бастыҥ үөрэнээччитэ Карина Басова Уолбаҕа туризм сайдар кэскилин сырдатта.
Концерка бииртэн-биир сонун, сэргэх көстүү арыллан фестивальбыт концерын нүөмэрдэрэ барыта ытыс дохсун тыаһынан арыалланнылар.

Уопсай түмүккэ бары көрүҥнэри хабан 189.97 баалы ыллыбыт. Бастыҥ нүөмэрдэринэн чабырҕах, эр киһи солота уонна аныгылыы сахалыы күннээҕигэ кэтиллэр таҥас дефилета буолан, 5 баалы ыллылар. Онтон Ойуунускай хоһооннорун уус-уран ааҕыы, трио, норуот ырыата, Таатта үрэх обраһын арыйар дефиле 4.9-туу баалы ылан барыбытын үөртүлэр.
Чахчы да — Түмсүү-төлкө төрдө — буоларын бигэргэтэн 70-ча киһи кыттыылаах улахан тэрээһиммит этэҥҥэ ааспытынан барыгытыгар эҕэрдэ!
Фестивальбыт үрдүк таһымҥа ааһарыгар күүс-көмө буолбут бары дьоммутугар барҕа махталбытын тиэрдэбит! бука бары доруобай этэҥҥэ сылдьыҥ диэн алгыыбыт!